လတ်တလော မြန်မာနိုင်ငံအနှံ့ ဖြစ်ပွားနေတဲ့ အခြေအနေတွေကြောင့် ပြည်သူတွေ အနေနဲ့ ဘေးအန္တရာယ်တွေအတွက် ကြိုတင်ပြင်ဆင်နိုင်ဖို့ အမျိုးသားညီညွတ်ရေးအစိုးရ (NUG)က သတိပေးချက် ထုတ်ပြန်ထားပါတယ်။
အဆိုပါ ထုတ်ပြန်ချက်ထဲမှာတော့ အရေးပေါ်အိတ်ကို ကြိုတင်ပြင်ဆင်ထားသင့်ကြောင်းနဲ့ အိတ်ထဲမှာ သောက်သုံးရေ၊ အတွင်းခံအပါအဝင် ပေါ့ပါးလွတ်လပ်တဲ့ အဝတ်အစားတချို့၊ အမျိုးသမီးဖြစ်ပါက လစဉ်သုံးပစ္စည်း၊ အရေးပေါ် ဆေးဝါး၊ လက်သန့်ဆေး၊ နှာခေါင်းစည်း၊ ဖယောင်းတိုင်၊ မီးခြစ်၊ မုန့်ခြောက်၊ ခေါက်ဆွဲခြောက်၊ တစ်ရှူးအစို၊ အခြောက်၊ ဓာတ်မီး၊ ဓာတ်ခဲ၊ ထီး၊ မိုးကာ၊ စာကြည့်မီး၊ ဖုန်း၊ အားသွင်းကြိုး၊ Power Bank၊ ဓား၊ ကပ်ကြေး၊ ရေဒီယို၊ ခရာ၊ မှတ်ပုံတင်၊ ယာဉ်မောင်းလိုင်စင်၊ အိမ်ထောင်စုစာရင်း၊ စာချုပ်စာတမ်းနဲ့ လုပ်ငန်းလိုင်စင်လို အရေးကြီး စာရွက်စာတမ်းတွေ၊ ငွေကြေး၊ ဘဏ် စာအုပ်နဲ့ တန်ဖိုးကြီး ပစ္စည်းတွေကို ကြိုတင်ပြင်ဆင်ထည့်ထားသင့်ကြောင်း ဖော်ပြထားပါတယ်။
ဒါ့အပြင် နေအိမ်ကို စွန့်ခွာရတော့မယ်ဆိုရင်လည်း မိသားစုတွေ ပြန်လည်ဆုံ ဆည်းနိုင်မယ့် အနည်းဆုံးစုရပ် ၂ ခုသတ်မှတ်ထားဖို့၊ အရေးပေါ် ဆက်သွယ်ရမယ့် ဖုန်းနံပါတ်တွေ ရေးမှတ်ထားဖို့၊ မိသားစုဝင်တွေရဲ့ အမည်၊ ဖုန်းနံပါတ်၊ သွေးအုပ်စုစတာတွေကို လက်မောင်းမှာ ရေးမှတ်ထားဖို့၊ တံခါးတွေ လုံခြုံအောင်ပိတ်၊ လျှပ်စစ်မိန်းခလုတ်တွေ ချထားခဲ့ဖို့နဲ့ မီးကြိုးပလပ်တွေ မမေ့မလျော့ ဖြုတ်ထားခဲ့ဖို့၊ ပေါ့ပါးလွတ်လပ်တဲ့ အဝတ်အစားတွေ ရွေးချယ်ဝတ်ဆင်ဖို့နဲ့ တကိုယ်တော် ယူဆောင်ရမယ့် အရေးပေါ်အိတ်ကို ယူ ဆောင်သွားဖို့ စတာတွေ ပါဝင်ပါတယ်။
တတိယတချက်အနေနဲ့တော့ နိုးကြားသတိရှိဖို့ တိုက်တွန်းထားပြီး ဘေးအန္တရာယ်တွေနဲ့ ပတ်သက်တဲ့သတင်းကို မပြတ်နားစွင့်ထားဖို့၊ နေအိမ်ကို စွန့်ခွာရမယ့် အနေအထားရှိမရှိကို သက်ဆိုင်ရာအရေးပေါ် တုံ့ပြန်ရေးအဖွဲ့တွေနဲ့ ချိတ်ဆက်သတင်းရယူဖို့၊ အရေးပေါ် အခြေအနေတွေမှာ သတင်းအချက်အလက် ရယူနိုင်မယ့် နည်းလမ်းတွေ၊ အချင်း ချင်းဆက်သွယ်နိုင်မယ့် နည်းလမ်းတွေကို ကြိုတင်ပြင်ဆင်ထားဖို့ လိုအပ်တယ်လို့ ဆိုပါ တယ်။
ဒါ့အပြင် နောက်ဆုံးတချက်အနေနဲ့ စားနပ်ရိက္ခာ အနည်းဆုံး ၂ ပတ်စာ ကြိုတင် ပြင်ဆင်ထားဖို့၊ ဆန်၊ဆီ၊ ဆား၊ ကြက်သွန်၊ အခြောက်အခြမ်း၊ စည်သွပ်ဘူး၊ ခေါက်ဆွဲခြောက်၊ မုန့်ခြောက်၊ အရေးပေါ်ဆေးဝါး၊ သောက်သုံးရေ၊ ဓာတ်ဆားနဲ့ ရေသန့်ဆေး၊ ထိခိုက်လွယ်အုပ်စုတွေဖြစ်တဲ့ ကလေးသူငယ်၊ ကိုယ်ဝန်ဆောင်၊ မသန်စွမ်း၊ သက်ကြီးရွယ်အိုတွေအတွက် ဖြည့်စွက်စာနဲ့ ဆေးဝါးတွေ စသဖြင့် ပြင်ဆင်ထားဖို့လည်း နှိုးဆော်ထားတာ ဖြစ်ပါတယ်။
မြန်မာနိုင်ငံမှာ ပြီးခဲ့တဲ့ ဖေဖော်ဝါရီ ၁ ရက်က စတင်ခဲ့တဲ့ မတရားစစ်အာဏာသိမ်း ကာလဟာ ၄ လခွဲကျော် ကြာမြင့်လာခဲ့ပြီဖြစ်ကာ ဆန့်ကျင်တော်လှန်နေကြတဲ့ ပြည်သူတွေနဲ့ အကြမ်းဖက်စစ်အုပ်စုလက်နက်ကိုင်တွေကြား ပဋိပက္ခတွေနဲ့အတူ မတည်ငြိမ်မှု တွေ ဖြစ်ပေါ်နေတာပါ။
မြို့ပေါ်နဲ့ ကျေးလက်ဒေသတွေအနှံ့ မတရားစစ်အာဏာသိမ်းမှုကို လက်မခံကြတဲ့ ပြည်သူတွေဟာ ဆက်လက်တိုက်ပွဲဝင်နေခဲ့ကြတာဖြစ်ပြီး မနေ့က ဇွန် ၂၂ ရက်နေ့မှာတော့ မန္တလေးမြို့မှာ စစ်ကောင်စီလက်နက်ကိုင်တပ်တွေနဲ့ ပြည်သူ့ကာကွယ်ရေးတပ် (PDF)တွေကြား မြို့ပြတိုက်ပွဲတွေ ဖြစ်ပွားနေတာ ဖြစ်ပါတယ်။