အိုမီခရွန်ရောဂါပိုး ပြည်တွင်းကူးစက်မှုတစ်ရက်တည်း ၇၂ ဦးတွေ့ရှိ

အိုမီခရွန်ရောဂါပိုး ပြည်တွင်းကူးစက်မှုတစ်ရက်တည်း ၇၂ ဦးတွေ့ရှိ

မြန်မာနိုင်ငံတွင် အိုမီခရွန်ရောဂါပိုးကူးစက်ခံရသူများအား ကျန်းမာရေးဝန်ကြီးဌာနမှ စစ်ဆေးတွေ့ရှိလျက်ရှိကာ ပိုးတွေ့ရှိသူများမှာ ပြည်ပနိုင်ငံများမှ ကယ်ဆယ်ရေးလေယာဥ်ဖြင့် ပြန်လည်ဝင်ရောက်လာသည့် မြန်မာနိုင်ငံသားများနှင့်နိုင်ငံခြားသားအနည်းငယ်တို့ဖြစ်ကြောင်း အဆိုပါ ဝန်ကြီးဌာန၏ စာရင်းများအရ သိရသည်။

ပြည်တွင်း၌အိုမီခရွန်ရောဂါပိုးကူးစက်ခံရမှုမှာ ပြည်ပမှပြန်လာသူတစ်ဦး၏ မိသားစုဝင်နှစ်ဦးတွင်သာ စစ်ဆေးတွေ့ရှိခဲ့ရပြီးနောက် ပြည်တွင်းကူးစက်ခံရမှုမှာထပ်မံစစ်ဆေးတွေ့ရှိခဲ့ခြင်းမရှိကြောင်း သိရသည်။

ထိုသို့ ပြည်တွင်းကူးစက်မှုထပ်မံမတွေ့ရှိရသော်လည်း ဇန်နဝါရီ ၂၈ ရက်တွင် အမျိုးသားကျန်းမာရေးဓာတ်ခွဲမှုဆိုင်ရာဌာနတွင် ကိုဗစ်(၁၉)ရောဂါသံသယလူနာများ၏ ဓါတ်ခွဲနမူနာများ ၈၆ ခုအားစစ်ဆေးရာ အိုမီခရွန်ရောဂါပိုး ၇၂ ခုအားစစ်ဆေးတွေ့ရှိခဲ့ရသည်။

အဆိုပါ အိုမီခရွန်ရောဂါပိုးတွေ့ရှိမှု ၇၂ ခုမှာပြည်တွင်းကူးစက်မှုဖြစ်ပြီး စစ်ကိုင်းတိုင်း၊တမူးမြို့မှ ၄၈ ဦး၊ကလေးမြို့မှ ၂၀ ဦး၊အဆိုပါ ဒေသများမှရောက်ရှိလာသူများမှ တစ်ဆင့်ထပ်မံကူးစက်ခံရသူ ၃ ဦးနှင့်ကိုဗစ်(၁၉)ရောဂါသံသယလူနာများမှအတည်ပြုလူနာ ၁ ဦး တို့ဖြစ်သည်။

ထိုသို့ ထပ်မံတွေ့ရှိခဲ့ရသဖြင့် မြန်မာနိုင်ငံ၌ အိုမီခရွန်ပိုးတွေ့ရှိသူပေါင်း ၂၈၃ ဦးရှိပြီးဖြစ်သည်ဟု ကျန်းမာရေးဝန်ကြီးဌာန၏ စာရင်းများအရ သိရသည်။

အဆိုပါ လူနာများအားသီးသန့်ထားရှိကာ ကုသစောင့်ရှောက်လျက်ရှိပြီး ပိုးတွေ့ရှိသူများ၏ ကျန်းမာရေးအခြေအနေမှာ ကောင်းမွန်ကြောင်း သိရသည်။အလားတူ ၎င်းတို့နှင့်အနီးကပ်ထိတွေ့ခဲ့သူများအား အသွားအလာကန့်သတ်ခြင်း (Strict Quarantine)နှင့်ဓာတ်ခွဲစမ်းသပ်စစ်ဆေးမှုများအား ဆောင်ရွက်လျက်ရှိသည်။