သောကြာနေ့ ဈေးပိတ်ချိန်က ကမ္ဘာ့ရွှေဈေးနှုန်းဟာ သီတင်းပတ် နှစ်ပတ်ကျော်အတွင်း အမြင့်ဆုံးကို ရောက်လာခဲ့ပါတယ်။
အမေရိကန်ဗဟိုဘဏ်က အတိုးနှုန်းတွေကို ရှေ့နှစ်ဆန်းမှာ စတင် လျှော့ချလာမယ်လို့ ယူဆရတဲ့အတွက် ရွှေဈေးအတက်ပြနေတာ ဖြစ်ပါတယ်။
ကမ္ဘာ့ရွှေဈေးဟာ တစ်အောင်စကို ၂၀၅၃ ဒေါ်လာဝန်းကျင်နဲ့ ဈေးပိတ်ခဲ့ပြီး ဒီဇင်ဘာ ၄ ရက်နေ့ နောက်ပိုင်းမှာ အမြင့်ဆုံးဈေး ဖြစ်ခဲ့ပါတယ်။ အမေရိကန်ရွှေကြိုပွိုင့်ဈေးကလည်း ၂၀၆၉ ဒေါ်လာနဲ့ ဈေးပိတ်ခဲ့ပါတယ်။
အမေရိကန်ဗဟိုဘဏ်အနေနဲ့ ၂၀၂၄ ခုနှစ်၊ မတ်လမှာ အတိုးနှုန်းတွေ စလျှော့မယ်လို့ အများက ခန့်မှန်းနေပြီး အဲဒီယူဆချက်တွေကြောင့်ပဲ ရွှေ အပါဝင် အဖိုးတန်သတ္တုဈေးနှုန်းတွေ အားကောင်းနေတယ်လို့ ဆိုပါတယ်။
တချိန်တည်းမှာ ကမ္ဘာ့ရွှေဈေးနဲ့ ပြောင်းပြန် ဖြစ်နေကျ ဒေါ်လာတန်ဖိုးကတော့ ငါးလအတွင်း အနိမ့်ဆုံးအထိ ကျသွားတဲ့အတွက် ဒေါ်လာနဲ့ ဈေးဖြတ်တဲ့ရွှေကို ဝယ်လိုအား ကောင်းစေပါတယ်။ (Current Content ကနေ တင်ဆက်တဲ့ သတင်း ဖြစ်ပါတယ်)
ကမ္ဘာ့ရွှေဈေး အမြင့်တန်းမှာ ရှိနေတာကြောင့် မြန်မာပြည်တွင်းရွှေဈေးကလည်း တစ်ကျပ်သားကို ၃၇ သိန်း ဝန်းကျင်မှာ ဆက်လက် တည်ရှိနေပါတယ်။
ထူးခြားချက်အနေနဲ့ အရင်က ပြင်ပရွှေဈေးနဲ့ ကျပ်သိန်းချီ ကွာဟလေ့ရှိတဲ့ ရန်ကုန်ရွှေလုပ်ငန်းရှင်များအသင်း YGEA ရဲ့ သတ်မှတ်ရွှေဈေးဟာ အခုတော့ ပြင်ပရွှေဈေးနဲ့ ထပ်တူနီးပါး လိုက်လာပြီး တစ်ကျပ်သားကို ၃၇ သိန်းအထိ ရောက်ရှိလာတာ ဖြစ်ပါတယ်။ Ref: Reuters စာရေးသူ – ဖီးနစ်
