ပြည်တွင်းမှာ တရားမဝင်ထီကိုထိုးမယ်ဆိုရင် ထိုးသူရဲ့ငွေစာရင်းတွေပိတ်ပင်ခံရတဲ့အထိဖြစ်လာနိုင်တယ်ဆိုပြီး စစ်ကောင်စီလက်အောက်ကအောင်ဘာလေသိန်းထီဆုဌာနရဲ့စီမံညွှန်ကြားရေးမှူးကပြောလာပါတယ်။ လတ်တလောမှာ စစ်ကောင်စီက တရားမဝင်ဘူးလို့သတ်မှတ်ထားတဲ့အဖွဲ့အစည်းတွေက ထီရောင်းချဖို့ပြင်ဆင်နေတယ်ဆိုပြီး နိုင်ငံပိုင်မီဒီယာကမေးတဲ့မေးခွန်းကို သူကပြန်လည်ဖြေကြားချိန်အခုလိုပြောဆိုလိုက်တာဖြစ်ပါတယ်။ ဘယ်အဖွဲ့အစည်းရယ်လို့တိတိကျကျပြောဆိုတာမရှိပေမဲ့ အမျိုးသားညီညွတ်ရေးအစိုးရ(NUG)က ထီအမျိုးအစားတစ်ခုကို ဖွင့်လှစ်ရောင်းချမယ်လို့ပြောနေချိန်မှာ သူရဲ့ပြောဆိုမှုထွက်ပေါ်လာတာဖြစ်ပါတယ်။ “E-Lottery(အွန်လိုင်းကနေထိုးနိုင်တဲ့ထီ)စနစ်မှာငွေပေးချေမှုကအဓိကအချက်တစ်ခုဖြစ်ပါတယ်။ မြန်မာနိုင်ငံမှာKBZ ငွေပေးချေမှုစနစ် ၊Wave Money (ငွေလွှဲ၊ငွေလက်ခံဝန်ဆောင်မှု)တို့အပါအဝင် Mobile Payment(ဖုန်းကနေငွေပေးချေနိုင်မှု) တွေ၊ Online Payment(အွန်လိုင်းကနေငွေပေးချေမှု) တွေ၊ Bank Transfer (ဘဏ်ကိုသုံးပြီးငွေကြေးလွှဲပြောင်းမှု)အားလုံးက ဗဟိုဘဏ်ရဲ့ထိန်းချုပ်မှုနဲ့ဆောင်ရွက်ရတာဖြစ်ပါတယ်။ ဗဟိုဘဏ်အနေနဲ့လည်း ဒီလိုတရားမ၀င်ထီနဲ့ ပတ်သက်တဲ့ငွေပေးချေတာတွေ၊ ငွေလွှဲပြောင်းမှုတွေကိုပြင်းပြင်းထန်ထန်အရေးယူဆောင်ရွက်မှုတွေရှိနိုင်ပါတယ်။ ဥပမာ- တရားမဝင်ထီအတွက်ငွေပေးချေမှုနဲ့ဆက်စပ်တဲ့ဘဏ်စာရင်းတွေကိုပိတ်သိမ်းတာ၊ ဘဏ်စာရင်းထဲကငွေတွေကိုထိန်းချုပ်တာ စတာတွေကိုကျယ်ကျယ်ပြန့်ပြန့်ဆောင်ရွက်နိုင်ခြေရှိပါတယ်”လို့ အောင်ဘာလေထီစီမံခန့်ခွဲရေးညွှန်ကြားရေးမှူးဦးညီညီလှိုင်ကပြောပါတယ်။ အောင်ဘာလေထီမှာ ထီလက်မှတ်ရောင်းချငွေစုစုပေါင်းထဲက ၆၀ရာခိုင်နှုန်းကို ဆုကြေးထုတ်ပေးပြီး ၄၀ရာခိုင်နှုန်းကို နိုင်ငံ့အခွန်အဖြစ်သတ်မှတ်ပါတယ်။ဖေဖော်ဝါရီလ ၁ ရက်မှာ စစ်တပ်ကအာဏာသိမ်းပြီးတဲ့နောက် ထီရောင်းရတဲ့ငွေတွေကနေ စစ်ကောင်စီလက်အောက်ဆီ အခွန်ငွေတွေမစီးဆင်းအောင်ဆိုပြီး အောင်ဘာလေထီကို မထိုးကြဖို့ လူထုကြားထဲလှုံ့ဆော်မှုတွေဖြစ်ခဲ့ပါတယ်။ […]
