” ဆရာကြီး …သမီး သီတင်းကျွတ် လာကန်တော့တာပါရှင့်” “ကျေးဇူးပါ..သာဓုပါကွယ်… အိမ်မှာ အဖေနဲ့အမေ ရှိသေးလား.. သူတို့ကိုရော ကန်တော့ပြီးပြီလား”
“ဟုတ်..ကန်တော့မှာပါ” “သမီးလခ ဘယ်လောက်ရသလဲ” “၃သိန်း -၄ သိန်းရပါတယ်””မိဘ ကို တစ်လ ဘယ်လောက် ကန်တော့လဲ” ” လစဉ်တော့မကန်တော့ဖြစ်ဘူးဆရာ..အခုလို သီတင်းကျွတ် .. သင်္ကြန်ဆိုရင်တော့ ကန်တော့ဖြစ်ပါတယ်..”
” လျှာရှည်တယ် စပ်စုတယ်တော့ မထင်နဲ့.. တစ်ခါကန်တော့ရင် ဘယ်လောက်ကန်တော့လဲ” ” လေးသောင်း/ငါး သောင်းလောက်တော့ ကန်တော့ဖြစ်ပါတယ်”
” တစ်နှစ်မှာ နှစ်ခါ သုံးခါ ထားပါတော့ တစ်နှစ်ကို ၁သိန်း/၂ သိန်းပေါ့… တစ်ရက်မှာ သမီး ၄၀၀/ ၅၀၀ ကျပ်လောက် ကန်တော့တယ် ဆိုတဲ့ သဘောပေါ့
အင်း ..လဘက်ရည်တစ်ခွက် ဘယ်လောက်လဲ” ” ၅၀၀ လောက်ဖြစ်နေပြီဆရာ” “သမီး မိဘကို တစ်ရက်ကို လဘက်ရည်တစ်ခွက် ဘိုး ကန်တော့သလိုဖြစ်နေတာပေါ့။
သမီးကို ဒီအရွယ်အထိ ထမင်းမကျွေးခဲ့တဲ့နေ့ရှိလား။ကျောင်းလည်းထား..အဝတ်အစားလည်းဆင်..နေမကောင်းလဲဆေးကုပေး ..ထမင်းလဲကျွေး မုန့်လဲကျွေး ဟုတ်တယ်နော် အနှစ်၂၀ ကျော်နေပြီ…
သမီး သူတို့ကို ဘယ်နှစ်နှစ်များ ပြန်လုပ်ကျွေးရသေးလို့လဲ…လဘက်ရည်တစ်ခွက်ဖိုးလောက်ပြန်လုပ်ကျွေးရတာကို တော်တော် ပင်ပန်းနေပြီဟုတ်လား…ခက်ခဲနေပြီ ဟုတ်လား”
” သမီးက ပေးတယ်..အမေတို့က မယူတာ..မုန့်တွေစားချင်တာတွေတော့ ဝယ်ပေးပါသေးတယ်””စိတ်မဆိုးနဲ့နော်..သမီးမိဘက ဘောစိလား” “မဟုတ်ပါဘူးဆရာရယ်..မရှိလို့ အခုလို တနယ်တကျေး
မိဝေးဖဝေး အလုပ်လုပ်နေရတာပေါ့..
သမီးလဲတစ်လတစ်လ မလောက်ဘူး””တစ်လ ၃သိန်း/၄ သိန်းဆိုတာ ဆရာတို့ အိမ်မက်တောင် မမက်ခဲ့ဘူးတဲ့လစာ။ ဒါကို မလောက်ရင် လောက်အောင် သုံးနိုင်အောင် ကိုယ့်ကိုယ်ကို စီမံခန့်ခွဲ ရမယ်လေ..
မိဘက မလိုလို့ မယူတာမဟုတ်ဘူး..မယူရက်လို့ မယူတာ.. လိုချင်တာ ဝယ်ပေးတာထက် သမီး ပေးတဲ့ ပိုက်ဆံလေး ကိုင်ချင်တာပေါ့။ ပြောမထွက်ရက်လို့သာ။
သူလိုချင်တာ သူစားချင်တာ၊ သူသောက်ချင်တဲ့ဆေး သူ့ပိုက်ဆံနဲ့သူဝယ်ချင်တာ… အိမ်ကိုကြွတဲ့ ဆွမ်းခံကိုယ်တော်ကို သူ့ကိုယ်ပိုင်ငွေနဲ့ ဝတ္ထု ကပ်လှုချင်တာ.. ဘုရားကိုသူ့ငွေနဲ့သူ လှုချင်တာ။ သူ့မြေးတွေကို သူကိုယ်ပိုင်ပိုက်ဆံနဲ့ မုန့်ဖိုးပေးချင်တာ။
အဲဒါကြောင့် သူ့လက်ထဲကို ငွေ ထည့်ပေးထားပါ။ သမီး ဘာတွေဖြည့်ဆည်းပေးပေး ငွေလဲ ကန်တော့ပါ။ သမီး တစ်လ ဖုန်းဘီလ် ဘယ်လောက်ကုန်လဲ””၃သောင်း-၄ သောင်း။ ” အဲဒီငွေထဲက တစ်လ ၁၀၀၀၀ လောက် ပိုအောင်စုကြည့်ပါ။
မိဘကို လစဉ် ပုံမှန်ကန်တော့ကြည့်ပါ။ တခါတည်း တစ်သိန်းကန်တော့တာထက် တစ်လတစ်ခါ ၁၀၀၀၀-၂၀၀၀၀ ကန်တော့ရတာ ကန်တော့ရတဲ့ သမီးလဲ ပေါ့ပါးတယ်။ ဝန်ထုပ်ဝန်ပိုးမဖြစ်ဖူးပေါ့။
လစဉ်မှန်မှန် ကန်တော့တဲ့အတွက် မိဘလဲ သမီးကန်တော့မဲ့ငွေ ၆လ တစ်နှစ် စောင့်စရာ မလိုပဲ အဆင်ပြေပြေရတယ်။ သုံးချင်တာလေးတွေလဲ သုံးချင်တဲ့အချိန် သုံးရတော့ကျေနပ်တာပေါ့”
ဆရာ ရှင်းပြတော့မှ အမေတို့ကို သနားလိုက်တာ
“ဟုတ်တယ်နော်။ သမီးကန်တော့တာ လဘက်ရည်တစ်ခွက်ဖိုးလောက်ပဲ ရှိတာပါလား” ကလေးမလေး မျက်ရည်တွေ ဝိုင်းလာသည်။ ” သမီး နေ့တိုင်း အပြင်မှာ ထမင်းစားရတယ်ဟုတ်လား။ အနည်းဆုံးတစ်နပ် ကို တစ်ထောင် ထားပါ။ တစ်နေ့ ၂၀၀၀-၃၀၀၀ ပဲ ။ သမီးမှာ ချစ်သူရှိရင် ဆိုင်ကောင်းကောင်းစားရတာနဲ့
လည်ပတ်ရတာနဲ့ သူ့မွေးနေ့ကိုယ့်မွေးနေ့ လက်ဆောင်တွေပေးရတာနဲ့ valentine day ဆိုရင် လက်ဆောင်ပေးရတာနဲ့ နေ့တိုင်းညတိုင်း ဖုန်းတွေပြောရတာနဲ့ … အားပါးပါး ကုန်လိုက်တဲ့ပိုက်ဆံတွေ…
အဲဒီအချိန်မှာ သမီး မိဘက သမီးပေးတဲ့ လဘက်ရည်တစ်ခွက်ကို နှစ်ယောက်ဆို တစ်ယောက်တစ်ဝက်သောက်နေရတာနော်…မုန့်မပါဘူး။ ထမင်း ဟင်းမပါသေးဘူး ..ဆိုတာလေး မျက်စိထဲ
မြင်ယောင်ကြည့်လိုက်ပါ။
သမီး တစ်လ ၃/၄ သိန်း ကုန်တယ်ဆို တစ်ရက် တစ်သောင်း နှုန်းလောက် သုံးနေတဲ့အထဲမှာ မိဘအတွက် ၄၀၀/၅၀၀ ပဲ ပါနေသေးတယ် လဘက်ရည်တစ်ခွက်ဖိုးပဲ ရှိသေးတယ်ဆိုတာ မြင်တွေးကြည့်လိုက်ပါ”
ကလေးမလေး မျက်ရည်တွေ ကျလာသည်။ ” သမီးမိဘက အဆင်မပြေလို့ဆိုပြီး သမီးကို တစ်ရက်ကလေး အငတ်ထားခဲ့ဘူးသလား” ကလေးမလေး အသံမထွက်တော့။ ခေါင်းခါပြသည်။ ” သမီး ..အခု မိဘကို အငတ်ထားသလို ဖြစ်နေပြီနော်။
မိဘ ဆိုတာ မသေခင်လုပ်ကျွေးရတာ။ သေပြီးမှတော့ ငိုပြမနေတော့နဲ့။ဖေ့ဘွတ်မှာ “ I love my mom “ “ I love my Dad “ လောက်ကို ကျေးဇူးဆပ်တယ်ထင်မနေနဲ့။ သူတို့ မစားနိုင် အိပ်ယာပေါ်က မထနိုင်တော့တဲ့ အချိန်မှလည်း ကျွေးမနေတော့နဲ့။
ဆရာ့ရဲ့ သီတင်းကျွတ် လက်ဆောင်ကတော့” မိဘကို အမြန်ဆုံး လုပ်ကျွေးပါ” လို့ပဲ ပြောချင်ပါတယ် သမီးရေ” ကလေးမလေး ငိုချတော့သည်။
” ကဲ…အခုလို ဆရာ့ကို ကန်တော့ရသော အကျိုးအားကြောင့် မိဘကို အလုပ်အကျွေးပြုနိုင်သော သမီးကောင်းရတနာ တစ်ဦး ဖြစ်ပါစေ လို့ ဆုတောင်းပေးလိုက်ပါတယ်”
မိဘက လိုအပ်သည်ဖြစ်စေ မလိုအပ်သည်ဖြစ်စေ လုပ်ကျွေးဖြစ်အောင် လုပ်ကျွေးကြပါ။ အမြန်ဆုံးလုပ်ကျွေးပါ။ တတ်နိုင်သမျှ များများ လုပ်ကျွေးပေးကြပါ။
မလုပ်ကျွေးရသေးတဲ့လူတွေလဲ မြန်မြန် လုပ်ကျွေးကြပါ။ လုပ်ကျွေးနေတဲ့ လူတွေလဲ ယခုထက်ပိုပြီး များများလုပ်ကျွေးကြပါ။
“ကျွန်တော် / ကျွန်မ တို့ အများကြီး ကြိုးစားရပါဦးမည်” သင်ဖတ်ပြီးလို့ လက်ခံတယ်ဆိုရင် အများသူငှါ အသိတိုးစေဖို့မေတ္တာဖြင့် ဖြန့်ဝေပါအုံးနော် ။
မူရင်းရေးသားသူအား လေးစားစွာဖြင့် ခရက်ဒစ် ပေးပါသည်။ ပြန်လည် မျှဝေခြင်း ဖြစ်ပါသည်။
